(ئۆبێکتی باڵای ئایدۆلۆژیا) یەکێکە لە چەند دەقە سەرەکییەکەی فەیلەسوفی چەپی سلۆڤینی (سلاڤۆی ژیژەک)، کە لە ساڵی 1989 بڵاوبۆتەوە. ژیژەک لەم دەقەدا، چەمکە سەرەکییەکانی فیکری خۆی بەکاردەهێنێت و کۆمەڵێک کێشەی فەلسەفیی بنچینەیی دەوروژێنێت، و هەریەکەشیان دەبەستێت بە پرسی ئایدۆلۆژیاوە. بۆیە کتێبەکە، بەشدارییەکی دیاری ژیژەکە لە پیاچونەوە بە چەمکی ئایدۆلۆژیا و کارکردەکانی لە ژیانی مرۆڤەکاندا. ئایدۆلۆژیاش ئەو مانا باوەى نیە کە تا ئێستا بیستوومانە, بەڵکو ڕەهەندێکى ئۆنتۆلۆژى و قووڵترى هەیە و تێدەگەین ئێمەى مرۆڤ پاش کەمێک هاتنەبوونمان پرۆسەى ئایدۆلۆژیسازى دەستپێدەکەین تا مانا بدەینە شتەکانى دەوروبەرمان و دونیا. ئەم کتێبە بەناو زۆر پرسى فیکریى تردا دەڕوات و ڕوانینمان بۆ دونیا هەستیارتردەکات. ئەو پێشگریمانانەش هەڵدەوەشێنێتەوە کە پێشتر هەمانبووە و هەروا ئاسان قبوڵمانکردوون. چەمکەکانى لاکان و هیگڵ و مارکس ئامادەییەکى بەردەوامیان هەیە و پاشان بەر چەندین ناوى دیارى ترى مێژووى فەلسەفە دەکەوین کە ژیژەک دەیانخاتە بەر مشتومڕ. ئەم كتێبە لەلایەن ماڵی مێخەكەوە چاپ و بڵاوكراوەتەوە.
